السلام عليكم
كيفكم بنات؟
اليوم البوست بيكون عن البدائل اذا ضاع منك شي وانتي عندك مناسبة
في اغلب الاحيان نسافر عشان نحضر مناسبات وننسى شي او يضيع شي وانتي بتطلعين بعد شوي
خلينا نبدا أول شي بالميك اب
اذا ما لقيتي أي لاينر وش تسوين ؟
خذي فرشاة الحواجب الي تصير زي كذا
بعدين افتحي ماسكرا وخذي من الاسود الي فيها وحطيه على الفرشة
وارسمي فيها الايلاينر
اذا ما لقيتي بلشر وش تسوين ؟
على حسب لون البلشر الي تبينه خذي روج بنفس اللون وحطيه بطريقة نقط عالمنطقة الي بتحطين البلش فيها بس لا تكثرين وخذي فرشة للدمج مثل كذا
وادمجيه ولين يصير زي ما تبين
واذا ما لقيتي فاونديشن وش تسوين ؟
اذا كانت بشرتك جافة خذي أي كريم مرطب للوجه بدون لون واكسري شوي باودر نفس لون بشرتك واخلطيهم وحطيه مثل ما تحطين الفاونديشن
أما اذا كانت بشرتك دهنية او فيها مناطق دهنية غطي الاماكن الي تحبين تغطيتها تصير عالية بالكونسيلر
والباقي حطي باودر نفس لون بشرتك وبالنهاية حطي فكس بلس *الي بشرتها صافية وتحتاج رتوش بسيط بتناسبها*
والطريقة الثالثة اذا كان عندك كونسيلر سائل بس ثقيل اخلطيه مع شوي كريم مرطب للوجه بدون لون ووزعيه عالوجه مثل الفاونديشن .
واذا ما لقيتي كونسيلر ؟
بعد البرايمر حطي فاونديشن تحت عينك بس لا تقربينه مرة من العين يعني من المنطقة الي فيها خطوط عشان ما يخطط خليه تحتها ومع الدمج شوي يطلع فوق اللون.
واذا كنتي من الي هالاتهم غامقة وما لقيتي مصححك البرتقالي وش تسوين؟
استخدمي أي روج برتقال او شدو برتقالي فاقع اخلطيه مع شوي كريم للوجه وحطيه.
واذا ما لقيتي روجك او اللون الي تبينه ؟
حطي مرطب الشفايف وخذي فرشة الشدو واختاري أي شدو او بلشر نفس اللون وحطيه على شفايفك بعد المرطب بالفرشة
واذا كنتي بتركبين رموش ونسيتي الصمغ او حستي فيها ونشف صمغها وما عندك صمغ وش تسوين ؟
خذي ماسكرا وشيلي من الاسود الي يطلع لك فوق وحطيه على يدك وجيبي فرشة الحواجب وخذي منه وحطيه على منابت الرموش الصناعية وبحركة سريعة ركبيها مع رموشك ورصيها لين تنشف
وبعدين حطي ماسكرا لهم مع بعض بس بشويش عشان يثبتون مع بعض .
أما اذا نسيتي الفير حقك او ضاع او شي وش تسوين ؟
غسلي شعرك ومشطيه وخذي خصلة على حسب كيف تبين يصير ويفي ولا كيرلي ولا ايش كل ما بغيتيه يكبر كبري الخصلة ولفيها وحطي بنسة لين ينشف وبعدين فككي شعرك.
وبكذا نكون خلصنا وان شاء الله اصير افدتكم .💓
ليست هناك تعليقات:
إرسال تعليق